MUHONGO AUMBUKA,LOWASSA AZIDI KUPETA

 

Kada wa Chama Cha Mapinduzi (CCM), na Waziri aliyejiuzulu kutokana na kashfa ya uchotwaji wa mabilioni ya fedha katika Akaunti ya Tegeta Escrow, Profesa Sospeter Muhongo, jana aliumbuka  baada ya Chama chake kukataa kupokea lundo la makasha ya CD (santuri) zenye picha za wadhamini wake 675.

 

Badala yake, alielezwa kwamba, hakuna kipengele kinachoruhusu kuwa na kumbukumbu hiyo.

 

Profesa Muhongo, alirejesha fomu yake ya kuomba kuteuliwa na chama hicho kugombea urais katika uchaguzi mkuu wa mwaka huu, saa 9:57 asubuhi na kumkabidhi Katibu wa Halmashauri Kuu ya Taifa ya CCM (NEC) na Oganaizesheni, Mohamed Seif Khatibu kwenye makao makuu ya chama hicho mjini Dodoma.

 

Baada ya kukabidhi fomu za wadhamini wake katika mikoa 15 aliyopita, Profesa Muhongo alitoa pia makasha 15 yenye CD za picha ambazo alidai amefanya hivyo ili kuonyesha hajapita njia ya mkato akidai anaamini mtu sahihi atakayeweza kuwavusha watanzania kwa sasa, ni yeye na si mgombea mwingine kati ya makada wote waliojitokeza kutaka kumrithi Rais Jakaya Kikwete.

 

Alipomaliza kuzungumza na kisha kukabidhi CD hizo, Khatibu alisema:”Bahati mbaya katika Daftari la kurejesha fomu za CCM za kugombea kiti cha Urais wa Jamhuri ya Muungano wa Tanzania, mwaka 2015 hakuna mahala panapoonyesha kwamba utapaswa kukabidhi CD ulizonipa…wanaangua (vicheko).”

Baada ya kuelezwa hivyo, aliondoka na kuziacha CD hizo kwa Khatibu.

 

Profesa Muhongo alijiuzulu uwaziri wa Nishati na Madini, baada ya kuhusishwa na kashfa ya uchotwaji wa zaidi ya Sh. bilioni 300 kutoka akaunti ya Tegeta Escrow iliyokuwa Benki Kuu ya Tanzania (BoT) na baadaye kutangaza nia ya kugombea urais.

 

MULENDA AREJESHA FOMU

Kwa upande wake, Leonce Mulenda ambaye naye alirejesha fomu yake ya kuomba kuteuliwa na CCM kugombea urais, aliiga mfumo uliotumiwa na watangulizi wake, Waziri wa Ujenzi, Dk. John Magufuli na Waziri wa Mambo ya Ndani ya Nchi, Mathias Chikawe, kugoma kuzungumzia safari yake ya kusaka wadhamini mikoani na kurejesha fomu kimya kimya.

 

Mulenda alirejesha fomu hiyo saa 5:35 asubuhi na kumkabidhi Khatibu na kumweleza kwamba amepata wadhamini katika mikoa 15 ikiwamo mitatu ya Zanzibar na baadaye kuagana na kuondoka huku akikwepa kuzungumzia safari yake.

  

LOWASSA AZOA WADHAMINI 42,405 MANYARA

Mbunge wa Babati Mjini (CCM),  Kiseryi Chambiri, amesema anamuomba Mungu jina la Waziri Mkuu wa zamani,  Edward Lowassa liwe ni miongoni mwa majina matatu ya wagombea urais yatakayofika katika Mkutano Mkuu wa CCM kwani litakapoonekana watakuwa wamemaliza kazi na uchaguzi.

 

Kauli hiyo aliitoa jana katika uwanja wa Old Majengo wilayani Babati wakati wa kukabidhi wanachama wa CCM waliojitokeza kumdhamini Lowassa katika mbio zake za kusaka urais kwa tiketi ya chama hicho. Katika Mkoa huo alipata jumla ya wadhamini 42,405.

 

 Chambiri alisema safari ya Lowassa ni ndefu lakini karibu wanafika mwisho na anachoomba katika majina matatu yatakayofika katika himaya yao kama wajumbe wa Mkutano huo jina lake liwemo kusudi waweze kufanya kazi.

 

 “Kwa sababu kwa mujibu wa taratibu za CCM majina yale matatu huletwa ili yaweze kupigiwa kura, kama jina lako halipo hatuwezi kufanya kazi na mimi nakuombea kwa mungu basi katika yale majina matatu yatakayoletwa kwaajili ya kupigiwa kura na lako liwepo,” alisema Chambiri.

 

 Alisema  endapo jina hilo litakuwapo watakuwa wamemaliza kazi na uchaguzi utakuwa umemalizika.

 

Naye Mwenyekiti wa CCM Mkoa wa Arusha Onesmo Nangole, alisema matumaini yaliyopo ni makubwa kwani Lowassa ni mtu mkarimu na mpole na chakula chake huliwa na masikini na mtu mwenye nywele nyeupe anautukufu.

 

Akizungumza na wanachama na wananchi, Lowassa aliwashukuru kwa kujitokeza kumdhamini na kusema imani huzaa imani na kwamba atahakikisha akipata nafasi hiyo atawatumikia.

 

 “Nawashukuru kwa wale walionidhamini najua CCM wanahitaji wachache lakini nimedhaminiwa na wengi, nitaenda kuyahifadhi nyumbani kwangu kama kumbukumbu na historia ya maisha yangu nasema nashukuru sana,” alisema Lowassa.

 

 Aidha alisema wakimchagua wahakikishe wanapenda kuchapa kazi maana anataka kuendesha nchi mchakachaka ili  kuondokana na umasikini.

 

Aliwawakumbusha kuhakikisha wanajitokeza kwa wingi kujiandikisha katika daftari la kupigia kura kwani ni haki yao ya msingi na kikatiba.

 

“Natamani niongee mengi lakini kanuni haziruhusi ibaki kusema naomba muendelee kuniombea katika hili na nina wapenda sana,” alisema Lowassa.

 

Awali Katibu wa CCM Wilaya ya Babati, Daniel Ole Porokwa, alisema wanachama wa CCM 42,405 wamejitokeza kumdhamini Lowassa katika mkoa huo tofauti na wengine waliodai hatapata wadhamini wengi Manyara.

 

“Waliokudhamini wote wamejitolea na ndiyo maana wapo hapa, haya ni mapenzi tu ya wananchi na naamini wewe ndio utakayekuwa Rais wa Tanzania…Hakatwi mtu hapa,”alisema.

 

Alisema katika wilaya ya Mbulu wamemdhamini 9,500, Babati Mjini 12,500, Babati Vijijini 6,000, Hanang' 5,700, Kiteto 5,550 na Simanjiro

10,300.

 

NYALANDU: TISIGOMBANE

Mgombea mwingine wa urais, Lazaro Nyalandu, amewataka wanachama wa CCM wasigombanishwe na uwingi wa wagombea wanaowania kuteuliwa.

 

 Akizungumzia mjini Songea, mkoani Ruvuma, baada ya kupata udhamini, Nyalandu alisema kuwapo kwa idadi kubwa ya wagombea kisiwe chanzo cha mpasuko ndani ya chama bali iwe chachu ya kukiimarisha.

 

 Alisema mwisho wa mchakato huo watia nia wote watapaswa kusimama juu ya yaliyofanywa na yatakayopangwa kufanywa na CCM na kuwa hakuna sababu ya kuwapo kwa mgawanyiko miongoni mwao.

 

Alihadharisha kuwa ikiwa kutatokea mgawanyiko ndani ya chama au watia nia hao na wanachama itakuwa sawa na familia isiyo na shukrani ambayo haitakaa isimame katika mafanikio.

 

MAKAMBA AMWAGA CHOZI

Kada wa CCM, January Makamba amejikuta katika wakati mgumu na kumwaga machozi jukwaani alipokuwa akielezea historia ya maisha yake na jinsi walivyoishi  na bibi yake mzaa mama katika kijiji cha Kyaka, wilaya ya Misenyi mkoani Kagera.

 

 Makamba alipanda jukwaani juzi jioni kwa lengo la kuwashuruku wana CCM kwa  kumdhamini,lakini kabla ya hajaanza kufanya hivyo alianza kuelezea maisha yake binafsi na bibi yake wakati huo wakiishi kijijini mwishoni mwa miaka ya 70.

 

Wakati Makamba akielezea maisha yake yalivyokuwa wakati akiishi na bibi yake, alijikuta sauti ikikwama na kulengwa lengwa na machozi jambo lililomfanya akatishe hotuba na kushuka jukwaani.

 

Kada huyo ambaye alikuwa mkoani Kagera kusaka wadhamini, baada ya kushuka jukwaani kwa kushindwa kuzungumza alikwenda kwenye kiti alipokuwa amekaa na kukaa kwa muda kabla ya kurudi jukwaani tena kuendelea kutoa shukrani kwa wanachama.

 

Hata hivyo, baada ya kurudi jukwaani hakutaka tena kuelezea maisha yake na bibi yake walivyokuwa wakiishi, badala yake alianza kuzungumzia changamoto mbalimbali zinazowakabili wananchi wa kijiji cha Kyaka pamoja na mkoa mzima wa Kagera.

 

Kabla ya kumwaga machozi jukwaani, Makamba aliwaambia wananchi hao kwamba alikaa na bibi yake akiwa anamfundisha kulima, kusalimia watu wakubwa pamoja na kuchunga mbuzi.

 

 Aliwaambia wananchi hao kwamba anayajua maisha ya kijijini kwa kuwa ameishi huko, hivyo  anadhamiria kupambana na ugumu wake ikiwa atapata ridhaa ya CCM kugombea urais kisha kuwa kiongozi wa nchi.

 

“Nimeishi huku na bibi yangu, najua maisha halisi ya huku na ndiyo maana nasema nataka kuleta majawabu ya changamoto zinazowakabili nyinyi wananchi,” alisema.

 

Makamba ambaye aliwasili kijijini hapo akitokea Bukoba mjini, alipata mapokezi makubwa ya Pikipiki na magari binafsi ambayo yaliongoza msafara wake hadi ofisi za CCM wilaya ya Misenyi na kupata wadhamini.

 

Baadhi ya wananchi wa kijiji hicho cha Kyaka walisikika wakiimba nyimbo za Kihaya maalum kwa ajili ya kumkabirisha huku wakisema Makamba amerudi nyumbani.

 

 Baada ya kupata wadhamini,  Makamba alipita katika shule ya msingi ya Kyaka ambayo alisoma kuanzia darasa la kwanza hadi la tatu ambako alikutana na mwalimu wake aliyemfundisha darasa la kwanza na kisha alielekea nyumbani kwa bibi yake.

 

MWINGINE ACHUKUA FOMU

Hellena Elinewinga, Mtaalam wa masuala ya utafiti, amekuwa kada wa 40 wa CCM kuchukua fomu ya kuomba kuteuliwa na chama hicho, kugombea urais wa Jamhuri ya Muungano wa Tanzania.

 

Akizungumzia hatua hiyo baada ya kuchukua fomu hiyo jana, Hellena alisema ameamua kujitosa katika kinuanganyiro hicho, kwa kuwa anachukizwa na baadhi ya aina ya viongozi wanaoshindwa kutoa huduma stahiki kwa watanzania na kujinufaisha wenyewe.

 

Hellena alikabidhiwa fomu hiyo jana, na Khatibu, saa 7:20 mchana huku akisisitiza kwamba kama chama chake kitamteua kugombea kiti hicho, atahakikisha viongozi wanaokwamisha mchakato wa maendeleo au kulihujumu taifa, wanahukumiwa adhabu ya kifo kutokana na mchango mbovu walioutoa.

 

Mgombea huyo anayefanya kazi na Asasi za Kiraia na Taasisi za Kilimo katika mikoa ya Kanda ya Kaskazini; ni mkazi wa Tarafa ya Masama, Wilaya ya Hai, mkoani Kilimanjaro.

 

Hellena (40), sasa anakuwa mwanamke wa sita kujitosa kuomba ridhaa ya chama chake. Wengine ni Waziri wa Katiba na Sheria, Dk. Asha- Rose Migiro; Naibu Waziri wa zamani wa Fedha na Mkuu wa Mkoa wa Kilimanjaro, Monica Mbega; Balozi Amina Salum Ali; Mkurugenzi wa Taasisi ya Utafiti wa Magonjwa ya Binadamu, Dk. Mwele Malecela na Ofisa Maendeleo ya Jamii, Ritha Ngowi.