Waamuzi wanane wasimamishwa kwa rushwa, uchunguzi waendelea

Rais wa TFF akitoa maelezo juu ya beji za Fifa za waamuzi kabla ya kuwakabidhi Waamuzi wapya. 

By Mwanahiba Richard  (email the author)

CHAMA cha Waamuzi wa Soka Tanzania (FRAT), kimewasimamisha kazi waamuzi wanane wanaohisiwa kujihusisha na vitendo vya rushwa ikiwa ni mpango wa kutokomeza rushwa kwenye soka.

Mwenyekiti wa FRAT, Nassoro Mwalimu, aliliambia Mwanaspoti kuwa, kumekuwapo na malalamiko mengi, hivyo wameamua kuchukua hatua za kuwasimamisha na uchunguzi ukikamilika wanaweza kuwafungia kabisa.

Jambo hilo limeungwa mkono na Rais wa TFF, Jamal Malinzi, ambaye aliwasisitiza wajumbe wa Mkutano Mkuu kuwa wawazi na kushirikiana na shirikisho hilo kumpelekea wanaojihusisha na rushwa ili wachukuliwe hatua kali za kisheria.

“Nampongeza Malinzi akiendelea kuchukua hatua kwa atakayepatikana na tuhuma za rushwa, hii isiwe kwa mpokeaji tu, bali na mtoaji. Kuna waamuzi ambao tumewasimamisha kwa hisia za kujihusisha na vitendo hivyo huku uchunguzi ukiendelea, mmoja ameondolewa kabisa na alifikia hatua nzuri ya kuchezesha Ligi Kuu.

“Tuna waamuzi 18 wenye beji za Fifa, kati yao sita ni wanawake, naamini umakini wa kuwapata wengine utaendelea rushwa ikipigwa vita, ila viongozi wa klabu ambao ndio vichocheo zaidi nao waadhibiwe,” alisema.

Aliitaka TFF kuchukua hatua kali pia kwa wanaowapiga waamuzi timu zao zinapofungwa. “Hii ni hatari waamuzi, wanapigwa, wanaumizwa, ipo siku watauawa, TFF bado hawajachukua hatua kwa matukio haya,” alilalamika.

Naye Malinzi alisema: “Sikubaliani na suala hili, naomba ambaye ameona kuna rushwa mahali iwe kwa waamuzi kupokea rushwa au kiongozi kutoa au mchezaji kupokea anitaarifu ili mhusika apewe adhabu itakayokuwa mfano, hatuwezi kuvumilia rushwa itutawale katika soka.”