KWANINI EPL HAITAPOKONYWA NAFASI YA NNE (4) MSIMU HUU?

 Kuna uvumi na fununu kwamba nafasi ya nne kwenye ligi kuu nchini Uingereza inaweza kuondolewa kama hakuna timu yoyote itakayoingia robo fainali kwenye michuano ya ligi ya mabingwa wa Ulaya kwa msimu huu ama kama klabu ya Everton haitafika mbali kwenye michuano ya Europa. Tukiachana na fununu na uvumi wa taarifa za kwamba EPL itanyang’anywa nafasi ya nne hebu tuangalie taarifa sahihi kwenye swala hili ni zipi kwa kujiuliza maswali machache ya muhimu: Swali la 1: Nchi mbalimbali zimepewa nafasi ngapi? Kwasasa msimamo unaonyesha nchi tatu za juu ambazo ni Hispania, Uingereza na Ujerumani zimepewa nafasi nne (4) kila mmoja za ligi ya mabingwa Ulaya wakati nchi tatu zinazofata yaani Italia, Ureno na Ufaransa zimepewa nafasi tatu kila mmoja. Ukiangalia orodha inaonyesha kuna timu ya kwanza mpaka ya mwisho yaani 1. Hispania, 2. Uingereza, 3. Ujerumani, 4.Italia, 5. Ureno na 6. Ufaransa. Na msimamo huu unatokana na mgawo wa alama (coefficient) ambao unatokana na pointi ambazo kila nchi inapata kutokana na jinsi klabu zake zitakavyofanikiwa katika ligi ya mabingwa Ulaya na Europa. Swali la 2: Mgawo wa alama (coefficient) unatafutwaje? Mgawo unapatikana kwa kuangalia wastani wa alama ambao unapatikana kwa KUGAWANYA ALAMA (points) ambazo klabu zinazoiwakilisha nchin fulani inazipata katika michuano ya UEFA na EUROPA kwa IDADI YA KLABU hizo. Halafu jibu litakalopatikana linajumlishwa na matokeo ya misimu minne iliyopita kupata mgawo (coefficient). Swali la 3: Alama zinapatikanaje? Kila timu inapata alama mbili itakaposhinda na alama moja itakapotoka sare, ingawa alama huwa zinagawanywa kwa nusu kwa mechi za hatua ya kuvuka (qualifying rounds) na mechi za mchangani (play-off rounds). Vilabu ambavyo vinafika hatua ya 16 bora, robo fainali, nusu fainali ama fainali kwa UEFA na EUROPA huzawadiwa alama moja ya ziada kwa kila hatua. Pia kuna nyongeza ya alama nne kwa kushiriki kwenye hatua ya makundi kwa ligi ya mabingwa na alama nne kwa kuvuka hatua ya makundi. Swali la 4: Uingereza kwenye msimu huu wamepata alama ngapi? Chelsea imepata alama 20, Arsenal 19.5. Manchester City 15, Everton 12, Liverpool 10, Tottenham 11 na Hull City 2.5 hii ikimaanisha mpaka sasa Uingereza ina jumla ya alama 90, ukigawanya kwa idadi ya timu ambazo ni saba, Uingereza inapata mgawo wa alama 12.857 kwenye msimu huu kwasasa. Swali la 5: Tukiangalia kwa misimu mitano iliyopita Uingereza iko wapi kwenye msimamo? Kiujumla Uingereza ipo nafasi ya pili ikiwa na alama 79.677 kwa misimu mitano iliyopita, yaani 18.357 (2010/11) + 15.250 (2011/12) + 16.428 (2012/13) + 16.785 (2013/14) + this year's 12.857. Huku Hispania ikishika nafasi ya kwanza ikiwa na alama 94.427 na ujerumani ikishika nafasi ya tatu ikiwa na alama 77.415. Swali la 6: Kuna nchi inaweza kuchukua nafasi ya Uingereza mwaka huu? Kiuhalisia haiwezekani kwasababu wapinzani wakubwa kwa Uingereza ni Italia ambao kiujumla wamepitwa alama 14 kwenye msimamo, hasa ukizingatia kwamba kwenye msimu wa mwaka 2013/14 Italia ilipata alama 14.166 wakai Uingereza ilipata alama 16.785 Swali la 7: Hivyo ni kweli Italia wanahatarisha nafasi ya nne kwenye ligi ya “Primia”? Ndiyo, hasa ukizingatia kwamba mpaka sasa wana timu sita kweny msimu huu, ambapo Juventus wako kwenye hatua ya 16 bora kwenye ligi ya mabingwa Ulaya huku Torino, Roma, Fiorentina, Napoli na Inter Milan zikishiriki ligi ya Europa. Pamoja na Italia kuwa na timu nyingi kwenye ligi ya mabingwa Ulaya na ligi ya Europa kwa msimu huu lakini bado ni vigumu kuipita Uingereza kwenye mgawo wa alama. Swali la 8: Je ni msimu gani ambao Uingereza inaweza kupoteza nafasi ya nne kwenye ligi ya mabingwa Ulaya? Msimu wa 2015/16 nafasi ya nne itakuwa salama na Uingereza haitaweza kupokonywa, msimu wa 2016/17 inabidi vilabu viilinde nafasi hiyo kwaajili ya msimu huo lakini kama vilabu vya italia vitaendelea kufanya vyema kwenye ligi ya mabingwa na Europa basi msimu wa 2016/17 nafasi ya nne itakuwa hatarini.