NEC, wanasiasa kujadili daftari la wapigakura

WAKATI Uandikishaji katika daftari la Kudumu la Wapiga Kura, unatarajiwa kuanza rasmi Jumatatu ya wiki ijayo, Tume ya Taifa ya Uchaguzi (NEC) leo inakutana na Vyama vya siasa kujadili mchakato huo.

Kwa mujibu wa mwaliko uliotumwa na tume hiyo kwa gazeti hili, umebainisha kuwa tume hiyo itakutana na vyama hivyo vya siasa leo jijini Dar es Salaam majira ya saa nne asubuhi.

Kukutana kwa tume hiyo na vyama hivyo pamoja na mambo mengine kunatokana na ombi la vyama hivyo kikiwemo Kituo cha Demokrasia Tanzania (TCD), kulalamika bungeni kuwa mchakato huo wa uandikishaji umeanza bila vyama vya siasa na wadau muhimu nchini kushirikishwa.

Katika mkutano wa 18 wa Bunge uliomalizika hivi karibuni, Kamati ya Uongozi ya Bunge ililazimika kufanya kikao kati yake na wawakilishi wa Serikali na wa TCD baada ya Mbunge wa Kuteuliwa, James Mbatia kufikisha suala hilo bungeni kupitia mwongozo wa spika.

Katika mwongozo huo, Mbatia alisema NEC imekiuka makubaliano kwa kuanza mchakato bila kushirikisha vyama vya siasa.

Alisema tume hiyo imeanza kufanya utaratibu wa mchakato huo katika Mkoa wa Lindi, Mkoa wa Mtwara, Mkoa wa Rukwa, na Mkoa wa Njombe bila wadau wakuu kushirikishwa kama tulivyokubaliana.

Kwa mujibu wa Mbatia, katika kikao cha Januari 8 mwaka huu, cha wadau ambao ni vyama vya siasa vinavyounda TCD, ndipo NEC iliwahakikishia kwamba kabla ya mchakato kuanza Februari 15 mwaka huu, ingekaa nao kujadiliana na kufikia makubaliano.